Shefja e Grupit Parlamentar të Lëvizjes Vetëvendosje(VV), Mimoza Kusari-Lila, në lidhje me ekzekutimin e pagave për grevistët ka theksuar se, ligji për greva e përcakton saktë kompensimin ose moskompensimin për grevistët.
Deputetja e VV-së ka thënë se me ligjin mbi grevën, parashihet se punëtorët qoftë në sektorin publik apo në atë privat, të cilët janë pjesë e grevës së deklaruar, sipas rregullave të parapara me ligj, nuk kompensohen për ditët të cilat nuk janë në vendin e punës.
“Në bazë të këtij ligji, do të vendoset për ekzekutimin e pagave për grevistët”, ka thënë Kusari-Lila.
Sipas saj, kjo është përgjegjësi e agjencive buxhetore dhe e Ministrisë së Financave.
Ndër të tjera, ajo ka njoftuar se të premten e 7 tetorit do të mbahet seanca e re plenare duke filluar nga ora 10:00.
Kusari-Lila ka bërë të ditur se në këtë seancë do të mbahet interpelancë me ministrin e Financave, Hekuran Murati, për çështjen “Cenimi i të drejtave të punëtorëve në administratën shtetërore me ndalimin e pagave, si dhe presioni mbi pushtetin lokal, ndërhyrja në autonominë e komunave” e ngritur nga Aleanca për Ardhmërinë e Kosovës(AAK).
Po ashtu, ajo ka thënë se do të shqyrtohen edhe shumë projektligje të reja, atë të institutit për krime lufte dhe atë për siguri kibernetike.
Gjithashtu në rend dite do të jetë edhe shqyrtimi i rekomandimeve, lidhur me raportin e auditimit për pasqyrat financiare të Ministrisë së Shëndetësisë për vitin 2021.