Kuvendi i Kosovës, të enjten e 28 prillit do të mbajë seancë plenare, ku në rend dite do të jetë propozimi i 40 deputetëve për caktimin e Komisionit Hetimor Parlamentar, lidhur me menaxhimin e krizës energjetike nga Qeveria e Kosovës.
Kjo pasi të mërkurën e 27 prillit, Lëvizja Vetëvendosje ka deklaruar se gjatë seancës plenare do të procedojë 40 nënshkrime për formimin e këtij komisioni.
Ndryshe nga kërkesa opozitare, mazhoranca do të përfshijë zgjerimin e hetimeve për sektorin e energjisë që nga shpallja e pavarësisë e deri në qeverinë aktuale.
Shefja e grupit parlamentar të Lëvizjes Vetëvendosje, Mimoza Kusari-Lila, ka thënë se komisioni i propozuar nga ta do të jetë ndryshe nga ai i opozitës.
Sipas saj, ky komision përveç pikave të kërkuara nga opozita, do të përfshijë hetimin e sektorit të energjisë që nga shpallja e pavarësisë e deri në ditët e sotme.
Lidhur me këtë, shefi i Grupit Parlamentar të Lidhjes Demokratike të Kosovës, Arben Gashi, ka thënë se si parti opozitare do ta përkrahë themelimin e dy komisioneve hetimore për energji.
Ai për RTV Dukagjini, ka theksuar se është e çuditshme se si pushteti kërkon themelimin e komisionit hetimor.
“Së pari duhet të formohet komisioni hetimor i kërkuar nga Partia Demokratike e Kosovës, pastaj komisioni hetimor parlamentar i kërkuar nga pushteti, që është e pazakontë që pushteti të kërkojë komision hetimor parlamentar, sepse i ka mekanizmat e shtetit, i ka policinë, prokurorinë, gjykatat të cilat mund të bëjnë hetim kriminal”, është shprehur Gashi.
Ndërkaq, kryetari i Komisionit për Ekonomi, Industri, Ndërmarrësi dhe Tregti, Ferat Shala, ka thënë se Lëvizja Vetëvendosje përmes iniciativës së saj, po tenton ta zvarritë procesin e krijimit të komisionit të kërkuar nga opozita.
“Kjo është orvajtja e radhës e mazhorancës për ta bllokuar nismën opozitare, për ta bllokuar nismën e PDK-së, për ta zbardhur të vërtetën mbi keqmenaxhimin në sektorin energjetik”, ka thënë ai në një prononcim për RTV Dukagjinin.
Sipas tij, ligjshmëria e kërkesës së Partisë Demokratike të Kosovës është e padiskutueshme, andaj siç ka theksuar ai, çdo përpjekje mund të krahasohet me një lloj diversioni politik.
Gjatë kësaj seance, në rend ditë është edhe shqyrtimi i dytë i Projektligjit për mbrojtjen e sekreteve tregtare.
Po ashtu, do të bëhet zgjedhja e një anëtari të Bordit të Radiotelevizionit të Kosovës, nga radhët e komuniteteve të tjera me shumicë.
Në rend dite do të jetë edhe zgjedhja e tre anëtarëve të Këshillit Gjyqësor të Kosovës. Gjithashtu edhe formimi i Organit Përzgjedhës të Pavarur për përzgjedhjen e anëtarëve në Organin Shqyrtues të Prokurimit.
Ndryshe, më 19 prill, kuvendi i Kosovës kishte dështuar t’i miratojë katër marrëveshjet ndërkombëtare, të cilat ishin në rend dite në seancën e sotme.
Këto marrëveshje nuk janë hapur për votim, pasi partitë opozitare kanë lëshuar sallën e kuvendit si formë proteste që pozita nuk përkrahi një mocion, që do të fuste në rend dite formimin e komisionit hetimor parlamentar për situatën me krizën energjetike.
Kuvendi i Kosovës dështon në miratimin e marrëveshjeve ndëkombëtare, miratohen disa projektligje