Emisari i Bashkimit Evropian për dialogun Kosovë-Serbi, Miroslav Lajçak, ka bërë të ditur se këtë javë në Bruksel do të mbahet takimi i parë i Komisionit të Përbashkët për personat e zhdukur gjatë luftës së fundit në Kosovë.
Përmes një postimi në Facebook, Lajçaku ka ndarë detaje nga angazhimet e tij të para për këtë vit, duke theksuar se ka nisur misionin në Shtetet e Bashkuara të Amerikës.
Atje ka zhvilluar takime me zyrtarë të lartë të Departamentit të Shtetit për të diskutuar mbi dialogun Kosovë-Serbi dhe çështjet gjeopolitike në Ballkan.
“Misioni im i parë i vitit më çoi në SHBA. Në Uashington, D.C., zhvillova diskutime të detajuara me Ndihmës Sekretarin e Shtetit për Çështjet Evropiane dhe Euroaziatike, Jim O’Brien, si dhe Zëvendës Ndihmës Sekretarin e Shtetit për Ballkanin Perëndimor, Sasha Kasanof. Diskutuam mbi sfidat dhe mundësitë gjeopolitike të rajonit, duke theksuar rëndësinë e bashkëpunimit dhe nevojën për progres në Dialogun e Normalizimit”, ka shkruar Lajçaku.
Ai ka theksuar se pas angazhimeve në SHBA, fokusi kryesor i kësaj jave do të jetë tek personat e zhdukur me takimin e Komisionit të Përbashkët.