I dërguari i posaçëm i Bashkimit Evropian për dialogun, Miroslav Lajçak, të martën do të jetë në Kosovë në përpjekje për të shtensionuar situatën në veri të Kosovës dhe për t’i bindur palët që të kthehen në dialog.
Emisari i BE-së do të takohet duke filluar nga ora 15:00 me presidenten e Kosovës, Vjosa Osmani.
“Në orën 15:00, presidentja e Republikës së Kosovës, Vjosa Osmani, pret në takim përfaqësuesin Special të BE-së, Miroslav Lajçak”, thotë njoftimi i Presidencës.
Ende nuk ka konfirmim për një takim me kryeministrin e Kosovës, Albin Kurti.
Në po të njëjtën ditë, Kosovën do ta vizitojnë edhe kryeministri i Holandës, Mark Rutte, si dhe ai i Luksemburgut, Xavier Bettel.
“Në orën 08:30, presidentja e Republikës së Kosovës, Vjosa Osmani, pret në takim kryeministrin e Holandës, Mark Rutte, si dhe kryeministrin e Luksemburgut, Xavier Bettel”, vijon njoftimi.
Ndërkaq, tensionet në veri nisën në fund të majit, kur kryetarët e rinj shqiptarë të Zveçanit, Leposaviqit dhe Zubin Potokut – nën asistimin e policisë – hynë në ndërtesat komunale, pavarësisht kundërshtimit të serbëve lokalë.
Bashkësia ndërkombëtare ka kërkuar nga Kosova dhe Serbia që t’i ulin tensionet dhe të organizohen zgjedhje të reja në katër komunat në veri.