I dërguari i Bashkimit Evropian për dialogun ndërmjet Kosovës dhe Serbisë, Mirosllav Lajçak ka thënë se po bëhet më e vështirë heqja e masave të BE-së ndaj Kosovës.
Në një intervistë për Radio Evropa e Lirë, Lajcak ka theksuar se është humbur një mundësi e mirë për t’i hequr menjëherë pas sulmit në Banjska.
“Pozicionin tim e kam bërë shumë të qartë publikisht. Menjëherë pas Banjskës kam bërë thirrje publike për heqje të masave kundër Kosovës, si gjest i mbështetjes dhe solidaritetit në këtë periudhë të vështirë. Mendoj që e kemi humbur një mundësi të mirë për t’i hequr. Më vonë, siç po e shohim, po bëhet më e komplikuar dhe më e vështirë. Por, është në agjendë të Këshillit dhe vendet anëtare po vazhdojnë të diskutojnë për to”, ka deklaruar Lajçak.
Largimi i masave apo jo është në dorë të shteteve anëtare, thotë Lajçak.
“Kjo është në dorë të vendeve anëtare. Vendet anëtare e kanë marrë vendimin për t’i vendosur masat dhe vendet anëtare tani janë duke diskutuar çfarë të bëjnë me masat. Kjo nuk është çështje e dialogut. Dinamika e vendeve anëtare është që duhet pasur konsensus të 27 vendeve anëtare”, ka vijuar ai./REL