I dërguari i posaçëm i Bashkimit Evropian për dialogun Kosovë-Serbi, Miroslav Lajçak, shpreson që kryeministri i Kosovës, Albin Kurti dhe presidenti i Serbisë, Aleksandër Vuçiq, të hyjnë në takimin e sotëm në Bruksel me vizion dhe guxim politik të nevojshëm për t’i sjellë të dy vendet më afër të ardhmes evropiane.
Lajçak, në një postim në Facebook, ka shkruar për përgatitjet për takimin teksa ka thënë se gjithë javën ia ka dedikuar përgatitjeve.
Ai ka thënë se në vizitën e tij në Kosovë e Serbi ka diskutuar për qëllimet e takimit për t’i rishikuar arritjet dhe për t’i planifikuar hapat e ardhshëm, veçanërisht lidhur me implementimin e Marrëveshjeve në rrugën drejt normalizimit.
“Kam vizituar Kosovën dhe Serbinë për të diskutuar qëllimin e këtij takimi – të shqyrtohen të arriturat dhe të planifikohen hapat e ardhshëm, veçanërisht në lidhje me zbatimin e Marrëveshjes për Rrugën drejt Normalizimit (…)Gjithçka është gati dhe shpresojmë që dy liderët të vijnë me vizion dhe guxim politik të nevojshëm për t’i sjellë Kosovën dhe Serbinë më afër të ardhmes së tyre evropiane”, ka deklaruar Lajçak.