Lidhja Demokratike e Kosovës nuk do të shkojë në takimin e thirrur nga Kryeministri i Kosovës, Albin Kurti, i cili përfshinte të gjitha partitë opozitare.
Lajmin për Portalin Dukagjini e ka bërë të ditur zëdhënësja politike e LDK-së, Sibel Halimi, e cila ka theksuar se lidhur me temën e dialogut në mes Kosovës dhe Serbisë, Kryeministri Kurti duhet të raportojë vetëm në kuvend.
“Aty, LDK do t’i ritheksojë dhe qëndrimet e saja. Ky ka qenë dhe dakordimi i liderëve nga takimi paraprak. Për LDK-në, marrëveshja finale me Serbinë duhet të bëhet vetëm rreth njohjes reciproke”, ka deklaruar Halimi.
Ndër të tjera, Halimi ka thënë se në marrëveshjen e njohjes, rendi kushtetues, integriteti territorial e sovraniteti i vendit janë të panegociueshme.
Tashmë, nga partitë e tjera opozitare është Aleanca për Ardhmërinë e Kosovës(AAK), e cila ka pranuar ftesën e tij.
Të mërkurën e 19 tetorit, Kryeministri i Kosovës, Albin Kurti, ka ftuar në takim të gjithë krerët e partive opozitare në Kosovë.
Këtë e ka bërë të ditur për Portalin Dukagjini, zëdhënësi i Qeverisë së Kosovës, Përparim Kryeziu, i cili ka thënë se takimi pritet të mbahet të premten gjatë mesditës.