Partia kryesore politike e serbëve të Kosovës nuk e ka shfrytëzuar as afatin shtesë për të marrë pjesë në zgjedhjet e jashtëzakonshme komunale në veri të vendit.
Lista Serbe, e cila përmes dorëheqjeve të kryetarëve të saj u bë shkaktare për shpalljen e këtyre zgjedhjeve, nuk ka aplikuar në afatin e fundit për regjistrim që ishte ora 16:00 e së premtes.
Mazllum Baraliu, ka organizuar katër palë zgjedhje në veri para shpalljes së Pavarësisë së Kosovës.
Ai gjithashtu ka drejtuar KQZ-së në atë periudhë dhe thotë se mospjesëmarrja e Listës Serbe në zgjedhjet e dhjetorit më shumë e dëmton demokracinë sesa legjitimitetin e procesit.
Ish-kryetari i KQZ-së, Mazllum Baraliu ka thënë se “Nga aspekti i legjitimitetit dhe legalitetit nuk ka asnjë problem dhe nuk mund të ketë në qoftë se marrin subjekte tjera politike pjesë dhe një pjesë e qytetarëve. Është për t’u veçuar fakti që ne në bazë të legjislacionit elektoral që kemi në fuqi, nuk e kemi një obligim të tillë të një pragu për shembull të pjesëmarrjes së domosdoshme në përqindje të popullsisë në një palë zgjedhje”.
Mirëpo, qëndrim të kundërt ka Instituti Demokratik i Kosovës, i cili akoma nuk ka vendosur nëse do ta monitorojë këtë proces zgjedhor.
Arbër Thaçi nga ky Institut vlerëson se bojkoti i Listës Serbe dëmton legjitimitetin e zgjedhjeve.
“Derisa jemi te legjitimiteti, mbarëvajtja e zgjedhjeve në këto rrethana të tensionuara dhe me një lloj organizimi logjistik dhe të sigurisë së tepruar nëpërmjet këtyre institucioneve, qofshin vendore, Policisë së Kosovës ose ndërkombëtare, KFOR-it mbase krijon përshtypjen për një lloj procesi jo shumë demokratik”, ka thënë Thaçi.
Aplikimet e tyre për të marrë pjesë në zgjedhjet për kryetar të Mitrovicës së Veriut, Leposaviqit, Zveçanit dhe Zubin Potokut më 18 dhjetor, i kanë dorëzuar në Komisionin Qendror të Zgjedhjeve 6 subjekte politike.
Sipas KQZ-së, Lëvizja Vetëvendosje dhe Partia Demokratike e Kosovës kanë dorëzuar emrat kandidatëve të tyre për katër komunat, “Partia Kosovski Srba” ka kërkuar të certifikohet vetëm për zgjedhjet në Leposaviq.
Kurse, Iniciativat qytetare “Mitrovica” dhe “Srpska Opstana” kanë aplikuar për çertifikim vetëm për zgjedhjet për kryetar të Mitrovicës së Veriut.
Ndërsa është paraqitur një kandidat i pavarur.
KQZ-ja do të komunikojë edhe me Këshillin Gjyqësor të Kosovës për të verifikuar nëse ndonjë nga kandidatët është i shpallur fajtor për vepër penale me një vendim përfundimtar të Gjykatës në tri vitet e fundit apo me vendim të gjykatës i është hequr e drejta për të qenë kandidat”, ka thënë zëdhënësi i KQZ-së, Valmir Elezi.
Kryetarët e katër komunave në veri dhanë dorëheqje më 6 nëntor, si shenjë revolte kundër vendimit të Qeverisë së Kosovës për targat ilegale serbe.