Këngëtarja turke, Gülşen, e cilësuar shpesh si Madonna e Turqisë është arrestuar të enjten e 25 gushtit për shkak të një shakaje që ajo kishte bërë për shkollat fetare në Turqi. Ndërsa katër ditë më vonë ylli i popit turk është vendosur në arrest shtëpiak.
Artistja turke mund të dënohet deri në tri vjet burg për “nxitje të urrejtjes dhe armiqësisë”.
Aktakuza drejtuar këngëtares përfshinë 48 faqe dhe ka 702 ankues, duke përfshirë individë, një organizatë pro-qeveritare për të drejtat e grave dhe një shoqatë nga shkollat fetare.
Kodi penal i Turqisë kriminalizon nxitjen e urrejtjes dhe armiqësisë kundër grupeve të ndryshme në shoqëri bazuar në klasë, racë, fe ose sekt, duke kërkuar dënim me burg në rastet që çojnë në kërcënime kundër sigurisë publike.
Në deklaratën e saj në polici të përfshirë në aktakuzë, Gülşen ka thënë se kishte bërë shaka me një anëtar të grupit, pseudonimi i të cilit ishte “imam”, por që nuk kishte ndjekur shkollën.
“Këtë nuk e kam thënë asnjëherë për të fyer apo denigruar studentët e Imam Hatips apo një segment të vendit tonë. Respekti im për të gjitha vlerat dhe ndjeshmëritë e vendit është i përjetshëm”, ka thënë ajo duke mohuar akuzat, raporton euronews.
Këngëtarja 46-vjeçare ishte bërë më parë një objektiv në qarqet islamike për shkak të veshjeve të saj të dukshme në skenë dhe për shpalosjen e një flamuri LGBTQ+ në një koncert.
Ndryshe avokati i Gülşen kishte bërë një kërkesë për lirimin e saj nga arresti shtëpiak por e njëjta ishte refuzuar.
Turqi: Arrestohet këngëtarja 46-vjeçare pasi bëri shaka me shkollat fetare