Në njoftimin e faqes zyrtare të Bashkimit Evropian(BE) për takimin që u mbajt të enjten e 18 gushtit në kuadër të dialogut Kosovë-Serbi, është bërë një lëshim ku kryeministrit të Kosovës, Albin Kurti, i është referuar si “lider i opozitës kosovare”.
Ndonëse gabimi u përmirësua më pas, ka ngjallur reagime të shumta.
E për këtë Eurodeputeti austriak, Lukas Mandl ka kërkuar sqarim nga krerët e Bashkimit Evropian(BE) duke përfshirë Përfaqësuesin e Lartë për Politikë të Jashtme, Josep Borrell, emisarin për dialog Kosovë – Serbi, Miroslav Lajçak, dhe presidenten e Komisionit Evropian, Ursula von der Leyen.
@vonderleyen, @JosepBorrellF, @OliverVarhelyi, @MiroslavLajcak, May I ask you for clarification on the matter the journalist @tschinderle has just raised? Faleminderit! Hvala! Thank you! Danke! Merci! https://t.co/KFF3EQawmD
— Lukas Mandl (@lukasmandl) August 18, 2022
Mandl ka shpërndarë postimin e gazetares austriake, Franziska Tschinderle, të cilës i është dukur e pabesueshme që Kurtit i janë referuar si “lider i opozitës”.
“Prisni pak. A e ka prezantuar BE-ja vërtetë Albin Kurtin si ‘lider të opozitës’ në vend të kryeministrit?”, ka pyetur ajo në Twitter.
Ndërsa Mandl në Twitter ka pyetur “A mund të ju kërkojë sqarime për këtë çështje që ka ngritur gazetarja Tschinderle? Faleminderit! Hvala! Thank you! Danke! Merci”.
Ndryshe më 18 gusht në Bruksel, kryeministri Kurti dhe presidenti i Serbisë, Vuçiq janë takuar në kuadër të dialogut Kosovë-Serbi me ndërmjetësimin e BE-së.
Ndërsa pas një takimi të gjatë, shefi i diplomacisë evropiane, Josep Borrell ka deklaruar se nuk ka pasur ndonjë marrëveshje gjatë këtij takimi por se dialogu duhet të vazhdojë në ditët në vijim deri më 1 shtator.
Borrell pas takimit Kurti-Vuçiq: Nuk ka marrëveshje, dialogu do të vazhdojë ditëve në vazhdim