Ministri në detyrë i Mbrojtjes së Kosovës, Ejup Maqedonci, gjatë qëndrimit të tij në Turqi në kuadër të Forumit Diplomatik në Antalya, ka zhvilluar një takim me presidentin e Industrisë së Mbrojtjes së Turqisë, Haluk Görgün.
Përmes një postimi në Facebook, Maqedonci njoftoi se gjatë takimit është diskutuar për thellimin e bashkëpunimit ndërmjet Kosovës dhe Turqisë në fushën e mbrojtjes dhe sigurisë, me theks të veçantë në zhvillimin e industrisë së mbrojtjes.
“Zhvillimi i industrisë së mbrojtjes forcon marrëdhëniet mes vendeve tona, si dhe kontribuon fuqishëm në zhvillimin e mëtejmë të kapaciteteve tona duke krijuar vetëqëndrueshmëri për municione të kalibrave të ndryshëm,” ka shkruar Maqedonci.
Ai gjithashtu theksoi rëndësinë e këtij bashkëpunimi strategjik për sigurinë rajonale dhe avancimin e kapaciteteve ushtarake të Kosovës.