Të dielën e një majit, në Prishtinë është mbajtur protesta nën thirrjen “Liri, Barazi, Solidaritet”, e organizuar nga blloku antikapitalist i Kolektivit për Mendim dhe Veprim Feminist, me rastin e Ditës Ndërkombëtare të Punëtorëve.
Një protestë e tillë mban qëndrim politik ngase janë puntorët ata në të cilët mbështetet Kosova, kishte thënë njëra nga anëtaret e Kolektivit për Mendim dhe Veprim Feminist, transmeton Telegrafi.
Ajo ka thënë se ka dy dekada që punëtorët rëndohen nga shtypja e korporatave dhe asgjësimi institucional.
“Të jesh grua, person LGBTI+, i ndonjë race tjetër, me nevoja të veçanta, je i papërshtatshëm edhe për t’u konsideruar si punëtore, kjo pasi ky sistem në të cilin ne gjendemi e që është sistemi patriarkal-kapitalist, është sistem i dhunës, i përçarjes, disiplinimit e shtypjes së shumicës në favor të pakicës”, kishte thënë ajo.
Një tjetër protestues ka reaguar, duke thënë se të punosh sot në Kosovë, ndonëse në kushte ç ‘njerëzore, është privilegji racor.
“Ne jemi në një ekonomi neoliberale, e cila është e organizuar në mënyrë thellësisht të padrejtë për komunitetet e identitete të caktuara. Të jesh rom, egjiptian apo ashkali në Kosovë, me automatizëm t’i privohesh nga e drejta për të punuar ose edhe kur punësohesh, akomodohesh në punët më denigruese e më keq të paguara.”, ka shtuar ai.
Protestës iu bashkua edhe 15-vjeçarja Esra Syla, e cila edhe pse nuk është e lindur në Kosovë, ka akuzar ish-drejtuesit e institucioneve për degradimin e shtetit të Kosovës.
Ajo ka thënë se protesta të tilla është dashur të bëhen shumë më herët.
“Nuk duhet ta gjykojmë kryeministrin tonë, Albin Kurti për mospunën e tij. Pse, sepse fajin e kanë ata që kanë qenë përpara në shtet si Hashim Thaçi e Isa Mustafa, faji iu takon atyre dhe jo neve, ata e vendosen shtetin deri në këtë pikë, ata e shteruan shtetin”, ka thënë ajo.
Protestuesit kanë bërë të ditur se do të vazhdojnë të protestojnë deri në projektimin e një organizimi politik e ekonomik, ku punëtorët janë të lirë nga çdo formë e shtypjes.
Pjesë e kësaj proteste ka qenë edhe komuniteti LBTQ+, të cilët kanë reaguar përmes një postimi në Facebook.