Mbetjet e tre trupave të shtetasve serbë të vrarë në luftën e fundit në Kosovë pritet t’u dorëzohen autoriteteve serbe të martën në pikën kufitare në Merdarë.
Kështu ka thënë për Dukagjinin, Ditor Haliti, drejtor i Institutit të Mjekësisë Ligjore (IML).
Haliti gjithashtu ka theksuar se mbetjet e trupave që do të dorëzohen sot janë mbajtur në Institut që nga përfundimi i luftës, por ka pasur probleme me identifikimin e tyre.
Sipas tij, ata ishin në mesin e 280 trupave të paidentifikuar në morgun e Prishtinës.
Gjatë luftës së viteve 1998/99 në Kosovë janë vrarë rreth 13 mijë persona, 10 mijë e 794 shqiptarë, 2 mijë e 119 serbë, ndërsa pjesa tjetër i përkasin grupeve tjera etnike.
Nga rreth 6 mijë persona të zhdukur me forcë në atë kohë, më shumë se 1 mijë e 600 persona mbeten të zhdukur sot.
Ndonëse pati pajtim në takimin në Bruksel në mes të kryeministrit të Kosovës, Albin Kurti dhe presidentit të Serbisë, Aleksandër Vuçiq për çështjen e të Zhdukurve gjatë luftës së fundit në Kosovë, miratimi i kësaj deklarate ngjalli mjaft reagime e polemika në opinionin publik.
Kjo deklaratë në të cilët palët janë pajtuar të angazhohen për zbardhjen e fatit të personave të zhdukur nga lufta e fundit në Kosovë detyron Serbinë të marrë përsipër hapjen e arkivave përfshirë edhe dokumentat e klasifikuara, mbi vendndodhjen e personave të zhdukur.