Kompania Rajonale e Ujësjellësit “Prishtina”, ka njoftuar që nga e hëna e 25 korrikut do të fillojë me shkyçjen nga sistemi i rrjetit të ujësjellësit për bizneset që kanë të papaguar një faturë të ujit e lart.
Në njoftimin e KRU “Prishtina” thuhet se borxhi total i sektorit të bizneseve të vogla e të mëdha është mbi 7 milionë euro (mbi 5 milionë euro bizneset e vogla dhe mbi 2 milionë euro bizneset e mëdha).
“Ua kujtojmë se Kompania Rajonale e Ujësjellësit “ Prishtina ” sh.a., qëllimin kryesor e ka ofrimin e shërbimeve të furnizimit me ujë të pijshëm për të gjithë konsumatorët në zonën e shërbimit. Për të përmbushur këtë mision me sukses dhe për të ofruar furnizim stabil me ujë, sigurisht që kërkohet angazhim maksimal dhe ka kosto të lartë në trajtimin e ujit dhe mirëmbajtjen e rrjetit të ujësjellësit dhe kanalizimit, në vazhdimësi”.
Kompania Rajonale e Ujësjellësit i ka dhuruar 6 ditë kohë të gjitha bizneseve të paguajnë faturat e papaguara për shërbime të ujit dhe kanalizimit.
“Masa e shkyçjes dhe më vonë rikyçjes do të shoqërohet edhe me shpenzime shtesë të cilat rrjedhin nga tarifat e parapara nga Autoriteti Rregullator për Shërbimet e Ujit dhe Urdhëresës Tarifore të Shërbimeve ARRU/UTSH-14/04/2022”.