Ndihmësadministratorja e USAID-it, Erin E. McKee, në një konferencë të përbashkët me presidenten e Kosovës, Vjosa Osmani, ka thënë se është mirënjohëse për mikpritjen që i është bërë nga Kosova duke thënë se kjo është “shenjë e partneritetit të ngushtë që kemi me Kosovën”.
“Normalizimi i raporteve mes Kosovës dhe Serbisë me njohjen e ndërsjellë në qendër është mënyra më e mirë që ta ndihmojë Kosovë, t’i përmirësojë raportet e saj me vendet fqinje dhe në këtë mënyrë edhe të zërë vendin e vet në mesin e vendeve të tjera, në kuadër të integrimeve evropiane”, ka thënë McKee.
Ajo ka thënë se qëllimi i Amerikës është që t’ua mundësojë të rinjve që të realizojnë shpirtin e tyre ndërmarrës që të përfshihen dhe të ndërtojnë të ardhmen evropiane.
“Prioriteti ynë mbetet që ta ndihmojmë Kosovës, gjatë bisedës me presidenten Osmani, e cekëm se ndërtimi i një të ardhme më të sigurt do të kërkojë një partneritet të qëndrueshëm ndërmjet institucioneve qeveritare, duke mbështetur nevojat e qytetarëve”, ka thënë ajo.
“USAID-i do të jetë aktiv në ndërtimin e një ambienti të përshtatshëm për zhvillimin e një sektori me ideja novatore”, ka vijuar ajo.
Ndërsa presidentja e Kosovës, Vjosa Osmani, ka thënë se gjatë takimit me ndihmësadministratoren e USAID-it, Erin E. McKee, ka kërkuar mbështetje për përpjekjet e eliminimit të dhunës mbi baza gjinore, për të cilën, ka marrë përgjigje pozitive.
Ajo ka theksuar se Kosova do të mbetet partner i ngushtë i USAID-it dhe partner kredibil.
Osmani: USAID – forcë shtytëse dhe katalizator i ndryshimeve pozitive në Kosovë