Nënkryetarja e Partisë Demokratike e Kosovës Vlora Çitaku ka reaguar pas situatës së krijuar në Veri të Kosovës, ku serbët lokal në katër komunat veriore i kanë bojkotuar institucionet e Kosovës, ku ka thënë se duhet të unifikohet i gjithë spektri politik në vende për tej kalkulimeve të ngushta elektorale.
“Me Albin Kurtin nuk pajtohemi pothuajse për asgjë. Madje nuk pajtohemi as me menaxhimin e situatës këto ditët e fundit”, ka treguar ish-ambasadorja e Kosovës në ShBA teksa ka shtuar se “Kosova është atdheu ynë i përbashkët. E Kosova sot po kalon ditët më të rënda që nga shpallja e pavarësisë”.
“Megjithatë, për ne, si parti politke shtetndërtuese, Kosova vjen para kalkulimeve të ngushta elektorale”, ka deklaruar Çitaku, pasi sipas saj ajo nuk e dëshiron dështimin e të parit të Kosovës në raport me Serbinë.
Më tej Çitaku ka thënë se për çështje të brendshme të Kosovës dëshirojnë të kenë debat me Kurtin.
“Por në raport me politikën e jashtme, e posaçërisht në funksion të fuqizimit të Kosovës, ne të gjithë duhet të synojmë konsenzusin. Nuk duhet t’i replikojmë modelet e kaluara të opozitës”.
Ajo ka përfunduar duke thënë se nuk mjafton vetëm të komunikohet, por duhet të këtë edhe koordinohemi me aleatët e Kosovës pasi sipas sa “pa aleat e pa miq është e vështirë”.