Ministri i Mbrojtjes, Armend Mehaj, ka thënë se ushtarakët Forcës së Sigurisë së Kosovës stuhitë i shndërrojnë në avantazhe, sfidat në mundësi për të treguar më të mirën e tyre.
Kjo deklaratë e Mehajt erdhi pasi, më herët gjatë të së shtunës FSK-ja ka organizuar aktivitetin e demonstrimit të aftësive për manovrim me kapacitete të Operacioneve Speciale dhe Kërkim-Shpëtimit malor në kushte dimërore.
Demonstrohen aftësitë e FSK-së për manovrim në kushte dimërore
“Të jesh gati për çdo situatë do të thotë të trajnohesh t’i bësh ballë çdo moti e çdo vështirësie. Ushtarakët e Forcës së Sigurisë së Kosovës stuhitë i shndërrojnë në avantazhe, sfidat në mundësi për të treguar më të mirën e tyre. Të pajisur me armatimet më moderne ushtarake, e me njohuri të reja strategjike, karakterin plot guxim të paraardhëse e sjellin në nivel tjetër, ekipe të konsoliduara, të pandashëm e të pamposhtur. Sypatrembur si shqiponjat e besnik të kombit si shqiptarët ndër breza. Ushtria e Republikës së Kosovës, Forca e popullit!”, ka shkruar Mehaj në Facebook, të bashkangjitur më një video, ku shihen ushtarakët e FSK-së duke demonstruar aftësitë për manovrim me kapacitete të Operacioneve Speciale dhe Kërkim Shpëtimit malor në kushte dimërore.