Mercedes-Benz është gati të investojë miliarda euro për të ndërtuar 10,000 pika të karikimit të shpejtë në Amerikën e Veriut, Evropë dhe Kinë deri në vitin 2030, tha të enjten prodhuesi i veturave luksoze.
Mercedes-Benzi do ta fillojë ndërtimin në Amerikën e Veriut këtë vit, duke synuar 2,500 pika karikimi në 400 vende në shumicën e shteteve të SHBA-së dhe Kanadasë deri në vitin 2027, u bë e ditur në panairin e makinave CES në Las Vegas, i cili zhvillohet nga 5-8 janar.
Shtetet e Bashkuara kanë rreth 140,000 karikues publikë EV, sipas të dhënave të korrikut 2022 nga Laboratori Kombëtar i Energjisë së Rinovueshme.
Sondazhet tregojnë se konsumatorët në mbarë botën janë të dekurajuar nga blerja e automjeteve elektrike për shkak të mungesës së infrastrukturës së karikimit.
Në Evropë, ku Mercedes-Benzi është tashmë pjesë e një sipërmarrjeje të përbashkët karikimi me Volkswagen, BMW, Ford dhe Hyundai të quajtur Ionity, infrastruktura është më tej, me rreth 375,000 pika karikimi të disponueshme në fund të vitit 2021, sipas një Studimi McKinsey.
Megjithatë, rajoni kërkon të paktën 3.4 milionë pika karikimi deri në vitin 2030 për të përmbushur një rritje të pritshme të kërkesës, thuhet në studim.
Mercedes-Benz ka aplikuar për certifikim në Kaliforni dhe Nevada për drejtimin e automatizuar të Nivelit 3, duke u mundësuar automjeteve të tij elektrike të marrin përsipër ngasjen deri në 60 kilometra në orë në seksione të përshtatshme të autostradës ose në trafik të dendur, bëri të ditur kompania.