Në mbledhjen e 112 të Qeverisë së Kosovës, është miratuar propozim-vendimi për kompensimin e dëmeve në bujqësi të shkaktuara nga fatkeqësitë natyrore për 22 komuna në vlerë prej 2.8 milionë eurove.
“Ministria e Bujqësisë mbulon 82% të dëmeve në bujqësi për 22 Komuna, në vlerë prej më shumë se 2.8 milionë €”, ka shkruar ministri i Bujqësisë, Faton Peci në Facebook.
Peci, e ka bërë të ditur listën e komunave që do të përfitojnë nga ky vendim i qeverisë:
“Kompensim të dëmeve në vlerë prej 2.826.464,05 euro, do të përfitojnë mbështetje fermerët nga 22 komuna të Republikës së Kosovës e që janë: Komuna e Deçanit, Drenasit, Ferizajt, Gjakovës, Gjilanit, Istogut, Junikut, Kamenicës, Leposaviqit, Lipjanit, Malishevës, Mitrovicës, Novobërdës, Komuna e Obiliqit, Pejës, Podujevës, Prishtinës, e Rahovecit, Shtimes, Skënderajt, e Vitisë dhe Komuna e Vushtrrisë”, ka shkruar Peci.
Ministri i Bujqësisë, ka bërë të ditur se vlerësimi është realizuar nga Komisioni i Ministrisë, bazuar në raportet të cilat komunat e prekura i kanë sjellë.
“Në mënyrë që vlerësimi të jetë sa më korrekt dhe gjithëpërfshirës kemi hartuar udhëzuesin për vlerësimin dhe kompensimin e dëmeve në bazë të të cilit edhe drejtoritë përkatëse bujqësore pranë Komunave kanë realizuar raportet e tyre”, ka njoftuar ministri Peci.