Ministria e Mbrojtjes së Kosovës ka thënë se të gjitha kuzhinat në kazermat e FSK-së po funksionojnë si zakonisht, duke shërbyer shujtat ditore të zakonshme.
Ndërsa, nga fotografia e siguruar nga Dukagjini, dreka e shtruar këtë të hënë për ushtarët e FSK-së nuk ka qenë e zakonshme dhe e plotë si ditët e kaluara.
Kjo me arsyen se shteti është detyruar të gjejë zgjidhje të përkohshme për përgatitjen e ushqimit për ushtarët e FSK-së, marr parasysh problemin me tenderin për furnizim.
Sipas njoftimit të ministrisë, ushqimi aktualisht po përgatitet nga kuzhinierët e huazuar nga Qendra Studentore dhe Shërbimi Korrektues i Kosovës.
“Të gjitha kuzhinat në kazermat e FSK-së janë duke funksionuar si çdo ditë tjetër. Pjesëtarëve të FSK-së janë duke ju shërbyer shujtat ditore të zakonshme, i vetmi dallim është që ushqimi është përgatitur nga kuzhinierët e huazuar nga Qendra Studentore si dhe Shërbimi Korrektues i Kosovës”, thuhet nga ana e ministrisë.
Lexo edhe: Maqedonci ftohet për raportim, deputetët duan sqarime për ushqimin e largimet në FSK
Sipas tyre, kjo është një masë e përkohshme, e cila do të zgjasë deri në rekrutimin e stafit profesional për kuzhinat e FSK-së.
“Synimi i Ministrisë së Mbrojtjes është që përmes procesit të rekrutimit të kuzhinerëve sa më parë të vendosim vet-qëndrueshmëri dhe mos varësi nga proceset e stërzgjatura të prokurimit si dhe nga operatorët ekonomik të pakët në Kosovë që mund të ofrojnë shërbime të tilla, duke i dhënë zgjidhje një herë e mirë një problemi të kahmotshëm”, thuhet në reagimin nga Ministria e Mbrojtjes.