Kryeministri i Kosovës, Albin Kurti, gjatë hapjes së mbledhjes së Qeverisë, ka deklaruar se Instituti për krimet e kryera gjatë luftës në Kosovë, do të funksionojë në kuadër të zyrës së kryeministrit.
Kjo është edhe pika e parë e rendit të ditës.
Ai ka theksuar se krimet e kryera dhe dëmet e shkaktuara duhet adresuar, sepse ato janë parakusht për paqe të qëndrueshme, stabilitet afatgjatë e zhvillim të mëtutjeshëm të shoqërisë.
“Instituti për krimet e kryera gjatë luftës do të funksionojë në kuadër të zyrës së kryeministrit. Vetëm me respektimin e duhur të së kaluarës mund të kemi një të ardhme të ndritur”, ka thënë Kurti.
Po ashtu, Kurti ka shtuar se gjatë një viti e gjysmë qeverisje, në vetëm 1/3 e mandatit janë kaluar mbi 150 projektligje, ndërsa në gjysmën e parë të këtij viti janë miratuar 87 sosh në kuvend.
“Përmes projektligjeve të miratuara kemi fuqizuar mekanizmat për luftimin e krimit dhe korrupsionit, deklarimin më efikas të pasurisë, inicimin e konfiskimit të pasurisë së pajustifikueshme. Kemi themeluar Gjykatën Komerciale, kurse sot do të trajtojmë projektligjin për Prokurorinë Speciale dhe atë për prokurorin e shtetit”, ka thënë ai.
Sipas kryeministrit, historia mëson se zgjidhjet afatgjate janë të paarritshme atëherë kur nuk bazohen në parimet e drejtësisë, e së vërtetës dhe garantimit për mospërsëritje.