Në mbledhjen e mbajtur sot më 13 mars të Qeverisë së Republikës së Kosovës, në mesin e shumë pikave, u diskutua edhe për propozim vendimin e shqyrtimit për blerjen e objekteve për nevojat e misioneve diplomatike të Republikës së Kosovës.
Propozimi nga ana e MPJD-së përfshinë blerjen e objekteve në Paris, Romë, Otavë e Ankara.
“Udhëhequr nga orientimi strategjik për konsolidimin e pranisë së Republikës së Kosovës në këto kryeqendra, në mbështetje të një strategjie gjithëpërfshirëse për reformimin, ristrukturimin dhe rritjen e nivelit të përfaqësimit të Kosovës përmes shërbimit të jashtëm të republikës, referuar rregullores së Qeverisë nr. 12/2012 për procedurën e blerjes dhe marrjes me qira të objekteve për misione diplomatike dhe konsullore të Republikës së Kosovës, propozoj miratimin e vendimit për blerjen e objekteve të ambasadave në kryeqendrat e sipërpërmendura”, u shpreh zv.ministri i MPJD-së, Kreshnik Ahmeti.
Tutje Ahmeti tha se miratimi i këtij vendimi do t’i hapte rrugë fillimit të procedurave të blerjes siç parashihet në legjislacionin respektiv në fuqi.
Dhe në fund të mbledhjës së 193-të me radhë të Qeverisë, pa asnjë votë kundër e asnjë abstenim, vendimi u miratua.