Përfaqësuesi Special i Bashkimit Evropian për Dialogun Prishtinë-Beograd, Miroslav Lajçak, ka mbërritur në ambientet e Qeverisë së Kosovës.
Lajçak do të qëndrojë në Kosovë, nga e hëna e 27 qershorit deri më datën 29, të po këtij muaji.
Kjo ishte bërë e ditur përmes një njoftimi për media nga Zyra e BE-së në Prishtinë.
“Përfaqësuesi Special i Bashkimit Evropian për Dialogun Beograd-Prishtinë dhe çështjeve të tjera rajonale të Ballkanit Perëndimor, Miroslav Lajçak, do të vizitojë Kosovën nga 27 deri më 29 qershor”, thuhej në njoftimin për media.
Në njoftim është bërë e ditur se emisari i BE-së gjatë vizitës në Kosovë do të takohet me Albin Kurtin dhe liderët e partive kryesore opozitare.
Gjithashtu, Lajçak planifikon të vizitojë edhe Prizrenin dhe veriun e Kosovës.
Ndër të tjera, në njoftim thuhet se “Fjalimi për media i emisarit Lajçak është planifikuar për të mërkurën e 29 qershorit. Detajet do të ndahen me përfaqësuesit e mediave të martën e 28-qershorit”.
