Ministria e Shëndetësisë përmes marrëveshjes me Ministrinë e Shëndetësisë në Turqi ka siguruar trajtimin pa pagesë për pacienten 13-vjeçare, e cila ka pësuar djegie të rënda trupore, si pasojë e incidentit me bombol gazi në Kçiq të Mitrovicës.
Pacientja ka marrë trajtim dhe kujdes shëndetësor në QKUK për më shumë se 10 ditë, mirëpo për shkak të gjendjes së rëndë shëndetësore, me kërkesën e ministrit Vitia dhe me vendimin e kryeministrit Kurti janë siguruar edhe mjetet për transport special ajror urgjent, ku pacientja tashme është hospitalizuar për trajtim në spitalin e Stambollit në Turqi.
“Sipas informatave nga spitali turk, vajza 13-vjeçare ka filluar të marrë trajtimin e nevojshëm dhe i urojmë shërim sa më të shpejtë!”, ka njoftuar ministria e Shëndetësisë.
Më 13 janar të këtij viti, 14 persona janë lënduar si pasojë e shpërthimit të bombolës së gazit në Kçiq të Madh të Mitrovicës.
Të gjithë të lënduarit ishin dërguar për shërim në Qendrën Klinike dhe Universitare të Kosovë (QKUK).
Shërbimi Spitalor Klinik dhe Universitar i Kosovës (ShSKUK) kishte njoftuar se pacientët kishin djegie të shkallës së dytë dhe të tretë, në gjymtyrë të ndryshme të trupit, përfshirë, fytyrë, duar, këmbë dhe pjesë të tjera të trupit.