Të hënën e 29 gushtit, Ministri i Financave, Hekuran Murati, ka pritur në takim Drejtorin Ekzekutiv të Bankës Botërore për Kosovë, Hayrettin Demircan, në kuadër të vizitës së tij të parë zyrtare në Kosovë.
Ministri Murati ka falënderuar Demircan për bashkëpunimin e suksesshëm me Bankën Botërore gjatë këtyre viteve, duke vënë theksin në mbështetjen e Bankës ndaj reformave strukturore e ekonomike në vend.
Gjatë takimit, Ministri Murati e ka njoftuar Demircan-in lidhur me indikatorët e fundit makrofiskal, si dhe masat e ndërmarra nga Qeveria për mbështetjen e familjeve që nga fillimi i pandemisë.
Nga ana e tij, drejtori Demircan u shpreh se Republika e Kosovës edhe më tej po dëshmon menaxhim të mirë ndaj krizave të viteve të fundit, ku edhe konfirmoi mbështetjen e mëtutjeshme të Bankës në fusha me interes të veçantë për Kosovën.
Së fundi, të dyja palët u pajtuan se sektori privat luan rol të rëndësishëm në zhvillimin e qëndrueshëm ekonomik të vendit.
Sipas njoftimit, thuhet se IFC si pjesë e Grupit të Bankës Botërore do t’i shikojë mundësitë e rritjes së mbështetjes edhe për sektorin privat.