Analisti politik, Imer Mushkolaj, e akuzoi ministren e Ministrisë së Industrisë së Ndërmarrësisë dhe Tregtisë, Rozeta Hajdari, se ka gënjyer kur ka thënë se nuk e njeh afaristin Ridvan Muharremin, i cili është arrestuar nën dyshimet për keqpërdorim të rezervave shtetërore.
Mushkolaj në “Debat Plus” tha se Prokuroria duhet ta “zbulojë” se kush është Ridvan Muharremi dhe cili është roli i tij në MINT.
“Pse po nisesh prej pretendimeve të mediave e gazetarëve, pretendimet e tyre janë pasuar me arrestime dhe lëndë është në Prokurori. Unë mundem të shkruaj të them janë humbur 1 miliard euro, nëse kam shpifur paditmëni. Çështja është në Prokurori, kemi kaluar nga raportimet gazetareske, punë e madhe cka kanë raportuar mediat. Për mua është e rëndësishme me vërtetu Prokuroria se pse nuk është ardhur i gjithë gruri. Për mua është e rëndësishme të dalë përgjegjësia e Ministrisë. Kush është Ridvan Muharremi që u zgjodh nga ministrja, pse rrejti publikisht ministrja që tha nuk e njoh, kurse avokati tha që është takuar me ministren me zyrtarë të Ministrisë, pse duhet me rrejtë. Kush është Ridvan Mujharremi, pse u zgjodh vetëm ai? A pati autorizim të shkojë në Turqi për grurë, a pati autorizim të shkojë në Poloni të negociojë për vaj”, tha ai.
Tutje, Mushkolaj tha se i ftuari në “Debat Plus”, Armend Muja, është nga të vetmit e partisë në pushtet që del e mbron Qeverinë e Kosovës në momente tejet të vështira.
“Për fat të keq, Armendi është i vetmi që duhet me dalë në studio e me ia mbulu bërllokun Qeverisë, këtu nuk vjen as zonja Hajdari, as Nagavci, as Gërvalla, as Aliu, as Rizvanolli. Armendi është prej të rrallëve që përpiqet t’ia mbulojë bërllokun Qeverisë”, tha ai.