Miliarderi Elon Musk ka shpërndarë çeqe prej 1 milion dollarësh për dy votues në Wisconsin, duke i shpallur ata si zëdhënës të grupit të tij politik, në prag të zgjedhjeve për Gjykatën Supreme të shtetit.
Kjo garë është cilësuar nga Musk si vendimtare për agjendën e Donald Trump dhe “të ardhmen e qytetërimit”.
“Është një çështje shumë e rëndësishme,” tha ai të dielën para një turme prej rreth 2,000 personash në Green Bay, duke dalë në skenë me një kapele në formë djathi – një simbol i njohur në Wisconsin.
Musk dhe grupet që ai mbështet kanë shpenzuar mbi 20 milionë dollarë për të ndihmuar kandidatin konservator Brad Schimel në zgjedhjet e së martës.
Rezultati i kësaj gare pritet të përcaktojë përbërjen ideologjike të gjykatës, e cila mund të vendosë për çështje kyçe në një nga shtetet më të rëndësishme elektorale në SHBA.
Kandidatja liberale, Susan Crawford, dhe mbështetësit e saj kanë protestuar kundër përfshirjes së Musk në këtë proces, duke e akuzuar atë për përpjekje për të ndikuar në drejtësinë e shtetit.
Musk argumentoi se Gjykata Supreme e Wisconsin mund të ndikojë në riorganizimin e zonave elektorale për Kongresin, gjë që mund të ndikojë në balancën e pushtetit në Dhomën e Përfaqësuesve.
“Nëse Gjykata Supreme e Wisconsin riorganizon distriktet, ata do t’i manipulojnë në mënyrë që Republikanët të humbasin dy vende…Pastaj do të përpiqen të ndalojnë të gjitha reformat që po bëjmë për ju, popullin amerikan”, tha ai.
Një përpjekje e Prokurorit të Përgjithshëm Demokrat të Wisconsin-it, Josh Kaul, për të ndaluar Musk nga shpërndarja e çeqeve u hodh poshtë të dielën nga Gjykata Supreme e shtetit, vetëm disa minuta para fillimit të mitingut të miliarderit.
Kaul theksoi se oferta e Musk ishte e paligjshme, pasi ligji i Wisconsin-it ndalon dhënien e diçkaje me vlerë për të ndikuar në votimin e dikujt.
Avokatët e Musk mbrojtën veprimet e tij duke argumentuar se shpërndarja e parave ishte një formë e shprehjes së lirë dhe nuk synonte të mbështeste drejtpërdrejt një kandidat të caktuar. Ata e krahasuan këtë me një iniciativë të ngjashme që Musk kishte ndërmarrë para zgjedhjeve presidenciale të vitit të kaluar, kur ofroi 1 milion dollarë në ditë për votuesit që nënshkruanin një peticion në mbështetje të Amendamenteve të Parë dhe të Dytë të Kushtetutës.
Kjo garë ka shënuar një rekord historik në shpenzime për zgjedhjet gjyqësore në SHBA, me më shumë se 81 milionë dollarë të investuara nga të dyja palët. Rezultati pritet të ndikojë në vendime të rëndësishme mbi të drejtat e abortit, riorganizimin e distrikteve elektorale, fuqinë e sindikatave dhe rregullat e votimit – çështje që mund të kenë ndikim edhe në zgjedhjet e mesmandatit në 2026 dhe presidencialet e 2028./The Guardian