Ministrja e Arsimit, Arbërie Nagavci, e ka përgëzuar Policinë e Kosovës, për aksionin e realizuar të premten, ku janë sekuestruar sasi e konsiderueshme e armëve në afërsi të shkollave në qytetin e Ferizajt.
Ajo ka theksuar, se çështjen e sigurisë në shkolla janë duke e trajtuar me prioritet dhe se për këtë gjë e kanë themeluar “Forumin Nacional për Shkolla Miqësore”, i cili sipas saj “do të përcjellë situatën e sigurisë, rritjes së mirëqenies dhe zhvillimit të shëndetshëm të fëmijëve/nxënësve në shkolla me qëllim të këshillimit, vlerësimit dhe orientimit të veprimeve të integruara ndërinstitucionale”.
Sipas Nagavcit, menaxhmentet e shkollave dhe Drejtoritë Komunale të Arsimit, duhet të jenë më të përgjegjshme.
“Megjithatë, roli i mësimdhënësve në edukim është kyç, duke qenë se janë ata pika e parë e kontaktit me fëmijët në shkollë. Por, menaxhmentet e shkollave dhe Drejtoritë Komunale të Arsimit, duhet të jenë më të përgjegjshme dhe të adresojnë shqetësimet që kanë të bëjnë me sigurinë e nxënësve”, ka thënë ministrja Nagavci.
Tutje Nagavci, ka theksuar rolin e familjes tek edukimi i fëmijëve të tyre, sipas saj, një raport i shëndoshë do ta përmirësonte gjendjen e krijuar në teren.
Ndryshe, të premten gjatë një aksioni policor në Ferizaj, “Janë bastisur dhe kontrolluar disa lokale, shtëpi dhe objekte përcjellëse, ku si prova materiale janë gjetur dhe konfiskuar: pesë armë zjarri (pistoleta), armë të gjata gjysmëautomatike dy, sasi e municionit, 40 copë thika kryesisht të nxënësve të shkollave të mesme, boksa metali – 10 copë, te nxënësit e shkollave të mesme, mulli për bluarje të marihuanës- gjashtë copë, shufra metali- katër copë, elektro shok – një copë”.
Konfiskohen armë zjarri, boksa metali dhe thika në shkollat e Ferizajt