Policia e Kosovës ka shoqëruar katër persona pas marrjes së informacioneve se një qytetar është thirrur në telefon dhe i është kërkuar të votojë për një parti të caktuar, përndryshe do t’i ndërpriteshin ndihmat sociale nga sistemi i Serbisë. Rasti ka ndodhur rreth orës 15:20.
Për Dukagjinin rastin e ka konfirmuar Zëvendësdrejtori i policisë në Mitrovicën e Veriut, Veton Elshani.
“Rreth orës 15 e 20 pas pranimit të informacionit se një qytetar është thirr në telefon dhe është kërkuar që të votoj për një parti të caktuar ose ndihmat sociale që i pranon nga sistemi i Serbis do ti ndërpriten, ka ndërhy policia. Dyshohet se thirrja ka ardhë nga qendra për punë sociale në Zubin Potok”.
Elshani tutje ka thënë se “Pas bastisjes këtij lokacioni janë gjet prova që ndërlidhen me veprën penale, ndërsa me këtë rast 4 persona janë sjellë në stacion të policisë si persona të dyshimtë në lidhje me veprën “Cenim i përcaktimit të lirë të votuesve””.
“Pas intervistimit të tyre dhe diskutimit me Prokurorin kujdestar do të vendoset se si të veprohet tutje” me këtë rast. ka thënë Elshani.