Në Prokurorinë Themelore të Mitrovicës këtë të martë u mbajt një takim mbi trajtimin e rasteve të dhunës në familje, me synimin për të forcuar bashkëpunimin ndërinstitucional dhe mbrojtjen e viktimave.
Takimi u organizua me iniciativë të koordinatores për rastet e dhunës në familje në Zyrën e Kryeprokurorit të Shtetit, Laura Pula, dhe koordinatorit të Zyrës për Mbrojtje dhe Ndihmë Viktimave, Burhan Maxhuni.
Të pranishëm ishin edhe U.D. kryeprokurori i Mitrovicës, Njazi Rexha, prokurorja Ajtene Zoni dhe zyrtarë të tjerë të institucioneve përkatëse.
Diskutimet u përqendruan në sfidat aktuale të hetimit dhe ndjekjes penale të rasteve të dhunës në familje, si dhe në masat për përmirësimin e mbështetjes për viktimat.
Laura Pula ka theksuar nevojën e një koordinimi të fortë mes institucioneve për të garantuar trajtim të shpejtë dhe efikas të këtyre rasteve, ndërsa Burhan Maxhuni ka potencuar rëndësinë e ndihmës psiko-sociale dhe ligjore për viktimat.
Nga ana e tij, kryeprokurori i Mitrovicës, Njazi Rexha, ka konfirmuar angazhimin për trajtim me prioritet të këtyre rasteve dhe për një bashkëpunim më të ngushtë me policinë dhe institucionet mbështetëse.
Sipas njoftimit, pjesëmarrësit u pajtuan për hapa konkretë në forcimin e mekanizmave të mbrojtjes dhe ndëshkimit të dhunës në familje.