Ish-ambasadorja e SHBA-së në Kombet e Bashkuara Nikki Haley, e ka pezulluar fushatën e saj presidenciale të mërkurën, duke siguruar që Donald Trump të fitojë nominimin republikan dhe të përballet sërish me presidentin demokrat, Joe Biden, në zgjedhjet e nëntorit.
Këtë e bëri të ditur vetë Haley, e cila tha se vendimi i saj për të kandiduar për presidente ishte “i bazuar në dashurinë time për vendin tonë”.
Ajo theksoi se nuk është penduar për këtë vendim.
“Jam e mbushur me mirënjohje për mbështetjen e madhe që kemi marrë nga i gjithë vendi ynë i madh, por tani ka ardhur koha të pezulloj fushatën time”, ka thënë ajo.
“Tani ka ardhur koha për të pezulluar fushatën time”, ka thënë Haley, duke theksuar se “nuk jam penduar”.
Haley zgjati më shumë se çdo sfidues tjetër republikan i Trumpit, por kurrë nuk përbënte një kërcënim serioz për ish-presidentin, kontrolli i hekurt i të cilit në bazën e partisë mbetet i fortë, pavarësisht padive të tij të shumta penale.
Ndeshja mes Trump, 77 vjeç dhe Biden, 81 vjeç – gara e parë e përsëritur presidenciale në SHBA që nga viti 1956 – është ajo që pak amerikanë e dëshirojnë. Sondazhet e opinionit tregojnë se si Biden, ashtu edhe Trump, kanë vlerësime të ulëta të miratimit mes votuesve.
Zgjedhjet premtojnë të jenë thellësisht përçarëse në një vend tashmë të përçarë nga polarizimi politik. Biden e ka cilësuar Trumpin si një rrezik ekzistencial për parimet demokratike, ndërsa Trump ka kërkuar t’i rindërtojë pretendimet e tij të rreme se ai fitoi në vitin 2020.