Për nder të 25-vjetorit të Çlirimit të Kosovës, në Prishtinë u mbajt ceremonia e parakalimit të njësive të Forcës së Sigurisë së Kosovës dhe të Policisë së Kosovës.
Parakalimi ka nisur nga objekti i Qeverisë së Kosovës dhe do të vazhdojë deri te sheshi “Zahir Pajaziti”.
Në këtë ngjarje morën pjesë përfaqësues të institucioneve të Kosovës, familjarë të dëshmorëve e mysafirë tjerë nga rajoni dhe më gjerë.
Në këtë ceremoni, presidentja e Kosovës, Vjosa Osmani ka thënë se këta trima e trimëresha që parakalojnë sot në shesh, janë forca të paqes dhe në mbrojtje të paqes e do të jenë gjithmonë në mbrojtje të Kosovës në çdo cep të saj.
Lexo edhe: Osmani: Kosovës i detyrohemi gjithnjë siç na la amanet kryetrimi ynë, Adem Jashari
Kryeministri i Kosovës, Albin Kurti, në këtë ceremoni ka thurur lavde për investimet e fundit në armatimin e Ushtrisë dhe avancimin e ushtarëve nëpërmjet shkollimit në shkollat më të ndritura ushtarake në botë.
Lexo edhe: Kurti: Ushtria e Kosovës s’ka qenë kurrë më e madhe dhe më e armatosur se sot
Lordi George Robertson, ish-ministër i Mbrojtjes së Mbretërisë së Bashkuar, në fjalimin e tij për nder të 25-vjetorit të çlirimit të vendit, kujtoi angazhimin e tij, së bashku me homologët e tij nga Gjermania, Franca, SHBA-ja për ngjarjet në Kosovë.
“E dinim se diçka duhej të veprua së bashku pavarësisht të rezolutës së Kombeve të Bashkuara, por ne e dinim gjithashtu se mosveprimi ynë do të lejonte që Milloshviqi të vazhdonte edhe më tej spastrimin etnik të shqiptarëve nga vendi i tyre”, ka deklaruar Robertson.
Robertson tha se pas 78 ditë të bombardimeve, u panë rezultatet dhe objektivi i NATO-s u plotësua.
“Ne dinim çfarë duhej të bëhej dhe e bëmë dhe 78 ditë më vonë ne pamë objektivin tonë të plotësuar. Ushtria e Milloshveiqit u largua, NATO-ja hyri dhe refugjatët u kthyen në shtëpi”, tha ai.
Ai mes tjerash u shpreh krenar për atë se çfarë ka bërë atëherë dhe krenar për të sotmen, “në një Kosovë shumetnike, paqësore në zemër të Evropës”.