Disa njësite policore të qyteteve të ndryshme të Kosovës janë nisur për në Mitrovicën e Veriut.
Gazetarët e RTV Dukagjinit, të cilët po raportojnë nga vendi i ngjarjes, kanë treguar se një numër i madh i njësiteve policore tashmë janë nisur, për të siguruar rendin në veri të vendit, aty ku situata veçse është e tensionuar, pas vendimit të Qeverisë së Kosovës për reciprocitet për targa të automjeteve dhe për mjetet e identifikimit.
Disa njësite policore janë nisur nga qyteti i Gjilanit, disa të tjera janë parë në fshatin Milloshevë.
Portali Dukagjini ju sjell pamje të këtyre njësiteve policore duke u nisur për në veri.
Ndryshe, bllokimi i rrugëve me barrikada në pjesët kufitare veriore ka filluar nga serbët lokalë.
Kjo si pasojë e vendimit të Qeverisë së Kosovës, i cili parasheh zëvendësimin e targave në targat zyrtare të Republikës së Kosovës, e i cili do të hyjë në fuqi nga e hëna e një gushtit.
Serbët lokalë në veri të Kosovës kanë bllokuar me kamionë edhe rrugën magjistrale në afërsi të pikëkalimit kufitar të Jarinjës, që gjendet në Komunën e Leposaviqit.
Po ashtu, në Rudarë të Zveçanit, është vendosur një bllokadë në rrugën magjistrale Prishtinë-Rashkë.
Qytetarëve me letërnjoftime të Serbisë do t’u dorëzohet një dokument në hyrje dhe dalje nga vendi, ngjashëm siç ndodh me qytetarët e Kosovës kur futen në territorin e Serbisë.