Forcat izraelite kanë qëlluar mbi pozicionet e përdorura nga paqeruajtësit e OKB-së në Liban të mërkurën dhe të enjten, thanë forcat e OKB-së, ndërsa Izraeli paralajmëroi civilët libanezë të mos ktheheshin në shtëpitë e tyre në jug të vendit ku po vazhdon me sulmet e tij mbi Hezbollahun.
Forca UNIFIL tha se dy prej paqeruajtësve të saj u plagosën në një nga incidentet kur një tank izraelit qëlloi në një kullë vrojtimi në selinë kryesore të forcës në Ras al-Naqoura, duke goditur kullën dhe duke shkaktuar rënien e tyre. Nuk pati viktima në dy incidentet e tjera, tha një burim i OKB-së.
“Çdo sulm i qëllimshëm ndaj paqeruajtësve është një shkelje e rëndë e së drejtës ndërkombëtare humanitare,” tha UNIFIL në një deklaratë.
Nga ana tjetër, Hezbollahu tha se kishte gjuajtur një raketë kundër forcave izraelite të enjten teksa po përpiqeshin të tërhiqnin viktimat nga zona e Ras al-Naqoura dhe ata u goditën drejtpërdrejt.
Nuk kishte asnjë koment të menjëhershëm nga ushtria izraelite, e cila po zhvillon një ofensivë të zgjeruar në Liban kundër Hezbollahut, të mbështetur nga Irani.
Konflikti shpërtheu një vit më parë kur Hezbollahu hapi zjarr në mbështetje të grupit militant palestinez Hamas në fillimin e luftës në Gaza.
Lindja e Mesme mbetet e tensionuar dhe në çdo moment pritet përshkallëzim i mëtejshëm i situatës, si përgjigje e Izraelit ndaj një sulmi raketor iranian më 1 tetor.
Shtetet e Gjirit po lobojnë në Uashington që të ndalojë Izraelin që të mos sulmojë Iranin, sepse ata janë të shqetësuar se objektet e tyre të naftës mund të vihen nën zjarr nga përfaqësuesit e Teheranit nëse konflikti përshkallëzohet, thanë burime të Gjirit për Reuters.
Presidenti i SHBA Joe Biden dhe kryeministri izraelit Benjamin Netanyahu folën të mërkurën për hakmarrjen e mundshme izraelite kundër Iranit, në një telefonatë të cilësuar nga të dyja palët si pozitive.