Drejtoria për Hetimin e Trafikimit me Narkotik, e asistuar nga Policia e Kosovës, ka realizuar operacion policor në disa lokacione në Prizren dhe në Gjakovë.
Kështu ka bërë të ditur për Dukagjinin, zëdhënësi i Policisë së Kosovës, Baki Kelani, i cili ka theksuar se operacioni ka rezultuar me arrestimin e disa personave të dyshuar dhe me konfiskim të narkotikëve.
“Mund të konfirmojmë se bazuar në urdhëresën e organeve të drejtësisë, Policia e Kosovës, konkretisht Drejtoria për Hetimin e Trafikimit me Narkotik, e asistuar nga njësitet relevante policore kanë realizuar operacion policor në disa lokacione në Prizren dhe Gjakovë”, ka thënë Kelani.
“Operacioni policor ka rezultuar me arrestim të personave të dyshuar, me konfiskim të narkotikëve dhe gjësendeve tjera, për të cilat do të njoftoheni pas përfundimit dhe kompletimit të rastit”, ka thënë tutje ai.
Sipas tij, detajet mbi të arrestuarit dhe substancat e konfiskuara do të publikohen pasi të përfundojë hetimi dhe të plotësohet dosja e rastit.