Deputeti i Partisë Demokratike të Kosovës (PDK), Mërgim Lushtaku, në lidhje me projektbuxhetin e vitit 2023 të prezantuar nga kryeministri i Kosovës, Albin Kurti, ka thënë se këtij buxheti i mungon plani zhvillimor dhe nuk i reflekton kërkesat esenciale të qytetarëve të Kosovës.
Sipas tij, ky buxhet nuk ka të bëjë me rritje reale ekonomike.
“Rritja ekonomike siç thuhet për vitin 2023 është imagjinare dhe bie në kundërshtim me Fondin Monetar Ndërkombëtar”, ka thënë Lushtaku.
Ndërkaq, deputeti i Lidhjes Demokratike të Kosovës (LDK), Besian Mustafa, në lidhje me deklaratën e Kurtit se është buxheti më i madh për vitin, ka thënë “kjo lëvdata që kemi buxhetin më të madh në histori qëndron çdo vit” pasi sipas tij, Kosova është shtet i vogël në zhvillim e sipër.
“Nuk ka asnjë zgjidhje të një problemi të vetëm, kemi një ndarje anemike te dikasteret e qeverisë”, ka thënë ai.
Ndërsa, Pal Lekaj nga AAK-ja ka thënë se buxheti nuk përputhet me nevojat e qytetarëve të Kosovës, pasi siç thotë ai, Kosova është në një gjendje ekonomike sociale të rëndë.
“Nuk reflekton me gjendjen që është sot Kosova”, ka thënë ai.
Kryeministri i Kosovës, Albin Kurti në seancën e 17 nëntorit në Kuvendin e Kosovës ka thënë se viti i kaluar ishte më i suksesshmi në historinë e Kosovës sa u përket të hyrave dhe rritjeve ekonomike, kështu sipas tij duke mundësuar që Kosova të ketë konsolidim të financave publike.
Ai ka bërë të ditur se buxheti i vitit 2023 do të jetë 3 miliardë e 212 milionë euro, gjersa ka shtuar, “Përveç se më i larti ndonjëherë, dyfish më i lartë se buxheti që e patëm trashëguar në vitin 2021”.
“Të hyrat buxhetore do të arrijnë deri në 2 miliardë e 884 milionë euro, kemi ndarë 745 milionë euro në kategorinë paga dhe mëditje, 493 milionë euro mallra dhe shërbime, 1 miliard e 98 milionë euro subvencione e transfere, 811 milionë euro shpenzime kapitale”, ka thënë Kurti.
Ai ka bërë të ditur se janë shtuar 240 pozita të reja në inspektorat të punës.
“Më shumë inspektorë në punë e shëndetësi që të përmirësohet cilësia e shëndetësisë, e tregut, mbledhja e tatimeve”, ka vijuar ai.
Po ashtu, kreu i Qeverisë së Kosovës ka bërë të ditur se janë ndarë 296 milionë euro për sektorin e shëndetësisë.
“Do të përmirësojmë infrastrukturën shëndetësore, do të shtojmë numrin e stafit shëndetësor, ndarjen e buxhetit për barna esenciale, gjithashtu me këtë projektbuxhet do të mundësojmë angazhimin e asistentëve për fëmijë me aftësi të kufizuara”.
Ndërsa për Ministrinë e Mbrojtjes ai ka thënë se buxheti i përgjithshëm do të jetë 123 milionë euro.
“Mbështetja në sektorin e sigurisë dhe mbrojtjes, 300 pozita të reja për policinë , 123 milionë euro buxheti i përgjithshëm i Ministrisë së Mbrojtjes”.