Ministri i Jashtëm i Maqedonisë së Veriut, Bujar Osmani, ka uruar me rastin e shënimit të 22 nëntorit, Ditës së Alfabetit Shqip.
Ai ka thënë përmes të tjerash se po punojnë në avancimin e cilësisë së mësimit në gjuhën shqipe.
“Urime 22 Nëntori! Në mbamendje gjithmonë sakrificën dhe përkushtimin e të parëve për Alfabetin tonë. Ndërsa, në agjendë dhe në duar gjithmonë punën për avancimin e cilësisë së mësimit në gjuhën shqipe”, ka shkruar Osmani.
Ndërsa, me rastin e shënimit të ditës së alfabetit shqip ka reaguar edhe presidenti i Maqedonisë së Veriut, Stevo Pendarovski, duke thënë se “jemi krenarë që shqiptarët janë pjesë e pandashme e Maqedonisë multikulturore”.
Presidenti Pendarovski, me rastin e shënimit të 22 Nëntorit – Ditës së Alfabetit Shqip, u dërgoi një mesazh urimi pjesëtarëve të bashkësisë etnike shqiptare në Republikën e Maqedonisë së Veriut, në të cilin mes të tjerash thuhet:
“Të dashur bashkëqytetarë shqiptarë. Sot festojmë një festë veçanërisht të rëndësishme për popullin shqiptar – 22 Nëntorin, Ditën e Alfabetit të gjuhës shqipe. 115 vjet më parë, pikërisht në Manastirin tonë, u bë njësimi i alfabetit të shqipes si një hap kyç për kodifikimin e gjuhës shqipe, e cila është padyshim një nga shtyllat më domethënëse të identitetit kulturor dhe shpirtëror të shqiptarëve”
“Në fillim të shekullit të 20-të në Perandorinë e atëhershme Osmane, intelektualët më të shquar shqiptarë nga e gjithë bota u mblodhën në një kongres që do të rezultonte me vendimin historik për miratimin e alfabetit të shqipes. Frytet e këtij akti vendimtar politik e kulturor i gëzojnë të gjithë shqiptarët kudo që janë”.
“Jemi krenarë që sot komuniteti shqiptar është pjesë e pandashme e Republikës multikulturore dhe multietnike të Maqedonisë së Veriut. Duke dërguar urimet më të sinqerta që festën ta kaloni në paqe, shëndet, gëzim dhe mirëqenie, dëshiroj të konfirmoj edhe një herë bindjet e përbashkëta për solidaritet dhe barazi, si çelës për prosperitetin e atdheut tonë të përbashkët”, thuhet në urimin e Pendarovskit.
