Presidentja e Kosovës, Vjosa Osmani, ka nderuar me homazhe dëshmorët dhe martirët e Krushës së Madhe, duke vizituar Kompleksin Memorial të këtij fshati. Ajo i ka përkujtuar ata që dhanë jetën në masakrën tragjike të 26 viteve më parë.
Osmani para mediave tha se nuk do të pushojmë, derisa krimet e Serbia të dalin para drejtësisë.
“Familjet e tyre jetojnë me dhimbje që pritja nuk merr fund. Në këtë pritje është edhe një emër, Ukshin Hoti. Një intelektual dhe zë i kombit u mor me dhunë dhe që nga atëherë nuk dihet asgjë, veçse dihet që e mori Serbia dhe pyetja se ku është Ukshin Hoti ende nuk ka përgjigje. Drejtësia për Krushën e Madhe është drejtësi për heronjtë dhe martirët e UÇK. Nuk do të pushojmë derisa krimet e kryera nga Serbia të dalin para drejtësisë”, tha presidentja Osmani.
Së bashku me presidenten Osmani ishte edhe kryetari i Komunës së Rahovecit, Smajl Latifi.
Në datat 25, 26 dhe 27 mars të vitit 1999, në fshatin Krushë të Rahovecit, u masakruan 243 persona, ndërsa 893 shtëpi private dhe shoqërore u shkatërruan nga flakët.
Masakra e Krushës së Madhe është një nga ngjarjet më të dhimbshme dhe të tmerrshme të kryera mbi popullsinë shqiptare nga ushtria serbe.
Osmani do të bëjë homazhe edhe në Krushë të Vogël.