Presidentja e vendit, Vjosa Osmani, e cila po qëndron në Budapest të Hungarisë në Samitin e Komunitetit Politik Evropian, ka thënë se në takim me kryeministrin e Luksemburgut, Luc Frieden ka theksuar nevojën e mbështetjes për anëtarësim të Kosovës në Këshillin e Evropës, heqjen e masave të Bashkimit Evropian(BE) ndaj vendit tonë dhe përshpejtimin e anëtarësimit në BE.
Përmes një postimi në Facebook, presidentja Osmani ka deklaruar se Kosova dhe Luksemburgu ndajnë përkushtimin e përbashkët për t`i forcuar marrëdhëniet dhe për t’i hapur kapitujt e rinj të bashkëpunimit.
“Kosova dhe Luksemburgu ndajnë përkushtimin e përbashkët për t’i forcuar marrëdhëniet dhe për t’i hapur kapitujt e rinj të bashkëpunimit. Në takim me kryeministrin Luc Frieden, theksova nevojën e mbështetjes për anëtarësim në Këshillin e Evropës, heqjen e masave të BE-së ndaj Kosovës dhe përshpejtimin e anëtarësimit të Kosovës në BE, bazuar në merita”, ka shkruar Osmani.
Presidentja Osmani gjatë qëndrimit në samitin e Budapestit, për tri ditë me radhë, ka takuar liderë të vendeve të ndryshme.