Në Kishinjev të Moldavisë është duke u mbajtur “EPC Summit”.
Presidentja e Kosovës, Vjosa Osmani, është ulur në mes të presidentit të Francës, Emmanuel Macron dhe kancelarit gjerman, Olaf Scholz, në kuadër të Samitit të liderëve evropianë.
Këtë e ka bërë të ditur Blerim Vela, shef i kabinetit të presidentes Vjosa Osmani, përmes një fotografie të cilën e ka publikuar në Twitter.
Ai ka thënë se ky samit ka filluar me një fjalim pasionant të presidentit të Ukrainës, Volodymyr Zelenksy.
“Samiti i EPC në Kishinjev fillon me një fjalim pasionant të Presidentit Zelenksy përballë krerëve të shteteve të 47 vendeve evropiane. Një shfaqje e madhe mbështetjeje dhe solidariteti me popullin e Ukrainës. Demokracitë do të mbizotërojnë kundër luftës së agresionit nga një vend hegjemonist”, ka shkruar Vela.
Samiti në Moldavi do të prekë një sërë çështjesh strategjike, duke filluar nga energjia te siguria kibernetike dhe migrimi.
Gjithashtu, gjatë Samitit, është paralajmëruar se Osmani do të takohet personalisht me Macron-in dhe Scholz-in për tensionet në veri.
Po ashtu, takim me ta do të ketë edhe presidenti i Serbisë, Aleksandër Vuçiq.