Presidentja e Kosovës, Vjosa Osmani, pas takimit me të dërguarin e posaçëm të Shteteve të Bashkuara për Ballkanin Perëndimor, Gabriel Escobar, dhe përfaqësuesin e Bashkimit Evropian për dialogun Kosovë-Serbi, Miroslav Lajçak ka thënë se Kosova është palë konstruktive, e përgatitur dhe e angazhuar në procesin e dialogut të përqëndruar në njohjen e ndërsjellë.
“Në takimin me të dërguarit e posaçëm Lajčák dhe Escobar shpreha përkushtimin e Kosovës për ta vazhduar bashkëpunimin dhe koordinimin me partnerët tanë, duke potencuar se angazhimi i vendit tonë në dialog është i bazuar në mbrojtjen e sovranitetit, rendit kushtetues dhe integritetit territorial të Kosovës, të cilat janë të paprekshme”, ka shkruar presidentja Osmani në Facebook.
E para e vendit ka thënë se Kosova asnjëherë nuk ka kontribuuar në tensione dhe është angazhuar vazhdimisht për paqe dhe stabilitet si dhe për zgjidhje evropiane.
Sipas saj, Kosova është një vend i ndërtuar mbi parimin e një shoqërie multietnike ku të gjithë kanë të drejta të barabarta, pa dallim etnie.
Ndryshe, të mërkurën e 24 gushtit, në presidencën e Kosovës, emisari Escobar dhe Lajçak, janë pritur nga presidentja Vjosa Osmani.
Ndërkaq, të martën, Osmani është takuar me emisarin amerikan Escobar, ku pas takimit, e para e vendit kishte bërë të ditur se institucionet e Kosovës do të jenë në komunikim dhe koordinim të vazhdueshëm me ShBA-të.
Osmani pas takimit me Escobar: Partneriteti ynë me SHBA-të vazhdon të jetë qenësor
Ajo kishte potencuar se Kosova do të vazhdojë të jetë palë konstruktive, e barabartë dhe e përkushtuar në procesin e dialogut, duke kontribuuar për paqe dhe stabilitet në vend dhe rajon.
Përveç presidentes, edhe kryeministri Albin Kurti ka pritur në takim emisarët ndërkombëtarë të mërkurën e 24 gushtit.
Pas takimit, Lajçak, tha se janë duke punuar ta gjejnë një zgjidhje në lidhje me situatën e tensionuar në veri të Kosovës.
Ai nuk pranoi të japë detaje të tjera, apo të komentojë deklaratën e kryeministrit Kurti, i cili kishte thënë se Lajçak kishte propozuar ide për targa neutrale.
Ndërkaq, Escobar tha se qëllimi i vizitës së tij në Kosovës, është që ta shfaqë mbështetjen e plotë të Shteteve të Bashkuara të Amerikës për dialogun Kosovë-Serbi, të ndërmjetësuar nga Bashkimi Evropian.