Njohësi i çështjeve të arsimit, Argjend Osmani, rreth vendimit të Ministrisë së Arsimit, Shkencës dhe Teknologjisë (MAShT), për Dukagjinin ka thënë se i njëjti mund të shkaktojë problem sepse rrezikohet që prindërit të mos i përdorin ato mjete për destinimin e duhur, e kështu nxënësit të mbeten pa tekstet e nevojshme mësimore.
“Vendimi i marrë nga MASHT-i që të bartë në xhirollogari të prindërve mjetet financiare, mund të shkaktojë probleme, pikë së pari sepse rrezikohet që prindërit të mos i përdorin ato mjete për destinimin e duhur e kështu nxënësit të mbeten pa tekstet e nevojshme mësimore”, ka thënë Osmani.
Ai ka thënë se mbulimi i kostos së teksteve mësimore ka qenë një ndihmesë për prindërit dhe ka ndikuar pozitivisht në mbarëvajtjen e procesit mësimor.
“Mbulimi i kostos së teksteve mësimore për nxënësit e klasave 1-9 ka qenë një ndihmesë për prindërit dhe ka ndikuar pozitivisht në mbarëvajtjen e procesit mësimor, përkundër faktit se janë evidentuar edhe shumë shkelje e cilësi e dobët”, ka thënë tutje Osmani.
Më herët në një konferencë për media, ministrja e Arsimit, Arbërie Nagavci, ka bërë të ditur se është duke e shqyrtuar mundësinë që këtë vit t’i transferojë mjetet financiare në llogaritë e prindërve, në mënyrë që ata t’i blejnë tekstet shkollore për fëmijët e tyre.
Ajo ka thënë se kjo është bërë në mënyrë që të mos ketë hapësirë për keqpërdorime të çmimeve me libra shkollor.
Deri më tani tekstet shkollore janë blerë nga shtëpitë botuese dhe nuk ka pasur nevojë që prindërit t’i blejnë vetë ato.
Me vendimin e ri mjetet do të alokohen në llogari të prindërve dhe ata do t’i blejnë në librari.
“Sivjet jemi duke shqyrtuar mundësinë që transferimi i mjeteve për sigurimin e teksteve shkollore sipas obligimit ligjor të MASHT-it të bëhet në llogaritë e prindërve dhe t’i blejnë tekstet për fëmijët e tyre. Shpejt brenda dy tri ditëve do të vendosim përfundimisht për këtë që po e shqyrtojmë”, ka thënë tutje Nagavci.
Rimbursimi, sipas Nagavcit, do të bëhet përmes faqes “e – Kosova”, ku shumica e prindërve kanë të hapur llogari.
“Mënyra si është menduar të bëhet rimbursimi ka të bëjë me derdhjen e mjeteve në xhirollogari. Është dizajnuar faqja në e-Kosova. Pjesa më e madhe e prindërve i kanë të hapura llogaritë. Do të jetë proces i lehtë, ku prindi në momentin që identifikon veten dalin emrat e fëmijëve, do të zgjedhet shkolla që krejt të shkojë në rregull, dhe në fund është edhe një klauzolë ku secili e merr përgjegjësinë që mjetet do t’i marrë, do t’i përdorë për blerjen e teksteve. Pagesa do të bëhet paraprakisht, pra mjetet të dalin e pastaj ato të shpenzohen për libra. Nuk do të ketë nevojë për fatura e tema të tjera. E kemi paraparë një shënim ku prindi e verifikon që mjetet i vendosen në llogari do t’i përdorë për blerjen e teksteve për fëmijë. Këto janë obligime të përbashkëta, të qeverisë, prindërve, shkollave e komunave”, ka shtuar ajo.
Nagavci ka shtuar tutje se nuk do të ketë vonesa dhe se librat do të jenë gati me një shtator kur edhe do të fillojë viti i ri shkollor.