Presidentja e Kosovës, Vjosa Osmani, është pritur me nderime të larta shtetërore në Mal të Zi nga presidenti malazez, Milo Gjukanoviq, të martën e 7 shkurtit.
Osmani po qëndron në Podgoricë me ftesë të homologut të saj, ndërsa do të takojë edhe kryeministrin e Malit të Zi, Dritan Abazoviq.
Në agjendën e presidentes Osmani është edhe vizita në komunën e Ulqinit dhe atë të Tuzit.
Në Ulqin, Osmani përveç takimit me kryetarin Omer Bajraktari, do të realizojë takime të ndara me përfaqësuesit e partive shqiptare në Mal të Zi dhe një grup intelektualësh dhe miqsh të Kosovës.
Kurse në komunën e Tuzit, pas takimit me kryetarin Nik Gjeloshaj do ta vizitojë një nga bizneset e suksesshme të kësaj komune, i cili njëherit është edhe investimi më i madh nga Kosova.