Presidentja e Kosovës, Vjosa Osmani, teksa ka uruar Suedinë për marrjen e kryesimit të Presidencës së radhës të Bashkimit Evropian, ka thënë se pret që të ketë bashkëpunim të ngushtë në përmbushjen e objektivave të përbashkëta.
Me anë të një postimi në Twitter, Osmani ka thënë se pret të forcohet uniteti kundër përpjekjeve për të minuar vlerat dhe interesat e përbashkëta.
“Ua uroj partnerëve tanë suedezë një Presidencë të suksesshme të Këshillit të BE-së. Mezi presim të punojmë së bashku për të përmbushur objektive tona të përbashkëta, për ta sjellë Kosovën më afër BE-së dhe për të forcuar unitetin kundër përpjekjeve për të minuar vlerat dhe interesat tona të përbashkëta”, ka shkruar Osmani.
Wishing our Swedish partners a successful Presidency of the EU Council.
We look forward to working together to meet our shared @sweden2023eu objectives, to bring Kosovo closer to the EU & to strengthen unity against efforts to undermine our common values and interests.
— Vjosa Osmani (@VjosaOsmaniPRKS) January 1, 2023
Ndryshe, Suedia nga 1 janari 2023 do të fillojë udhëheqjen e saj gjashtëmujore të Presidencës e Bashkimit Evropian.
Presidencën e BE-së të njohur edhe si Presidenca e Këshillit të BE-së, Suedia do ta marrë nga Çekia.
Suedia e cila do të mbajë Presidencën deri më 1 korrik 2023 ka përcaktuar temat që do të ketë prioritet në periudhë.
Lufta e Rusisë kundër Ukrainës, efektet e saj në sigurinë dhe furnizimet energjetike për të gjithë Evropën, dhe forcimi i aftësive ushtarake dhe zinxhirëve të furnizimit të BE-së do të jenë çështjet kryesore të gjashtë muajve të Suedisë në krye të Këshillit të Bashkimit Evropian.