Pas takimit me Presidenten e Komisionit Evropian, Ursula von der Leyen, presidentja e Kosovës, Vjosa Osmani, ka thënë është vendimtare që Bashkimi Evropian t’i qëndrojë Kosovës pranë dhe ta mbështesë në përballje me krizat me të cilat po ballafaqohet.
Në një konferencë të përbashkët për media, Osmani beson se ka ardhur koha që BE-ja të ndërmarrë veprime konkrete drejt integrimit të vendeve demokratike të Ballkanit Perëndimor në strukturat evropiane që sipas saj është parakushtpër paqen dhe stabilitetin e qëndrueshëm në rajon.
“Vizita juaj sot rikonfirmon edhe njëherë përkushtimin e Komisioni Evropian ndaj Kosovës dhe rajonit tonë në këtë periudhë përcaktuese për gjithë kontinentin. Është vendimtare që BE të na qëndrojë pranë dhe të na mbështesë në përballje me krizat me të cilat të gjithë po ballafaqohemi në radhë të parë me krizën energjetike”, ka thënë ajo.
Presidentja Osmani ka potencuar se kjo vizitë e presidentes së KE-së, është dëshmi e përkushtimit të saj për integrimin e rajonit.
“E dimë që jeni plotësisht e përkushtuar për integrimin e rajonit tonë dhe mendoj se vizita juaj është një dëshmi për këtë megjithatë duhet të kërkojmë mbështetje nga të gjitha strukturat e BE-së”, shtoi ajo.
“E mirëpresim faktin që mbështetja e rajonit në këtë drejtim është në qendër të vizitës suaj dhe shpresojmë që përmes një bashkëpunimi të afërt do t’i identifikojmë mekanizmat e duhur për lehtësimin e përballjes me rritjen e çmimeve të energjisë, për investime në projekte të vogla e të mëdha në burime të ripërtritshme të energjisë, për investime në përmirësimin e infrastrukturës energjetike dhe kapacitetit të rrjetit dhe investime në masa të efiçiencës së energjisë”, ka thënë ajo.