Gjykata Supreme e Kosovës së fundmi e ka publikuar një mendim juridik për “shpërblimin e shujtës ditore, pagesës së 13-të, shtesat në pagë për kualifikim shkollor dhe pagën jubilare në Policinë e Kosovës”.
Në lidhje me këtë, avokati Kastriot Feka në emisionin “Rreth e Rrotull” ka treguar se këto të drejta të njohura përfshijnë pagën e 13-të për vitet 2018, 2019, 2020, 2021 dhe 2022, shpërblimin jubilar për vitet e njëjta, si dhe shpërblimet e shtesave në pagë për kualifikim shkollor.
“Ne si zyre kemi paraqitur disa kërkesa, njëra ndër to ka qenë shujta, ka qenë paga e 13-të, paga jubilare, paga për shkollimin. Gjykata e refuzoi çështjen e shujtave, na i aprovoi pagat e 13-ta, jubilare”, ka thënë avokati Feka.
Ai ka thënë se së bashku me një avokat tjetër përfaqësojnë diku mbi 5000 policë, për të cilët kanë dërguar padi civile pasi çështja e kërkesave është individuale.
“Ne jemi 2 avokatë, të cilët kemi qenë zyrtarisht të angazhuar nga sindikata e policisë, i përfaqësojmë 5000 policë. Për të mos krijuar shpenzime shtesë i kemi dërguar në një padi nga 5 zyrtarë policorë, jemi munduar sado pak ta kursejmë gjykatën të mos ketë bllokada të lëndëve. Kjo ka qenë individuale, pasi nuk janë paguar prej fillimit, është padi civile, pasi trajtimi i së drejtave u është shkelur”, ka theksuar ai.
Ai ka thënë se lajmi nga Gjykata Supreme është pritur shumë pozitivisht nga pjesëtarët e policisë dhe se edhe policë të tjerë kanë filluar të paraqiten me padi të reja.
Ndryshe, më 20 tetor, Gjykata Supreme e Kosovës e ka publikuar një mendim juridik për “shpërblimin e shujtës ditore, pagesës së 13-të, shtesat në pagë për kualifikim shkollor dhe pagën jubilare në Policinë e Kosovës”.
Deputeti i PDK-së, Rashit Qalaj, i cili e publikoi këtë dokument, tha se Qeveria e Kosovës krahas pagesës së shtesave për rrezikshmëri, të sigurimit shëndetësor dhe pensionimin e parakohshëm duhet t’i paguajë edhe shtesat.
Në mendimin juridik të Gjykatës Supreme thuhet se “personeli i policisë ka të drejtë në shpërblimin e një page mujore ekuivalente me pagën e rregullt mujore në fund të vitit, për vitin 2018, 2019, 2020 dhe 2021”.
Po ashtu, sipas këtij dokumenti, “personeli i policisë ka të drejtë në shpërblimin e shtesave në pagë për kualifikimin shkollor për vitin 2018, 2019, 2020, 2021 dhe 2022”.
Sipas Gjykatës Supreme, “personeli i policisë ka të drejtë në shpërblimin e pagës jubilare për vitin 2018, 2019, 2020, 2021 dhe 2022.