Panairi i Librit ka hapur dyert në Tiranë, duke sjellë për lexuesit shqiptarë botime dhe oferta që e bëjnë këtë vit të veçantë.
Në stendën e Shtëpisë Botuese Dukagjini, lexuesit kanë gjetur jo vetëm tituj të rinj dhe të njohur, por edhe një atmosferë mbështetjeje me zbritje të shumta.
Koordinatorja dhe lektorja e Shtëpisë Botuese Dukagjini, Liridona, për këtë edicion të panairit, shprehet se pjesëmarrja e lexuesve është më e madhe se kurrë.
“Ne jemi këtu prej dje që ka filluar panairi, dhe do të jemi deri të dielën. Sidomos në stendën tonë po vërehet një numër i madh i njerëzve sepse kemi tituj të shumtë. Këtë panair kemi sjellë 35 tituj të rinj, të cilët janë bashkuar me titujt që i kemi pasur në panairet e kaluara”, ka treguar ajo.
Për t’i dhënë lexuesve një arsye më shumë për të vizituar stendën, Dukagjini ka prezantuar një kampanjë unike të quajtur “Happy Day”.
Çdo ditë gjatë panairit, një libër i veçantë ofrohet me një ulje çmimi deri në 60 për qind.
“Për këtë ne çdo ditë zgjedhim një libër që e publikojmë në mëngjesin e ditës,” ka shtuar Liridona, duke e bërë kështu këtë ofertë surprizë për të gjithë dashamirësit e librit.