Kompania e energjisë e Ukrainës u ka kërkuar qytetarëve të karikojnë gjithçka pasi do të ketë ndërprerje të energjisë, e shkaktuar nga sulmet e raketave ruse.
Sulmi i impianteve të energjisë ka ndodhur të mërkurën e 19 tetorit.
Ndërkohë që të enjten është paralajmëruar ndërprerje e energjisë deri në katër orë, që do të përfshijnë gjithë vendin, ka njoftuar operatori i rrjetit Ukrenergo, shkruan BBC-ja.
Në përgatitje për ndërprerjen e energjisë elektrike, Ukrenergo u ka bërë thirrje ukrainasve që të furnizohen me ujë dhe të sigurohen për ngrohtësi.
“Telefonat, bankat e energjisë, pishtarët dhe bateritë duhet të karikohen”, ka thënë ai.
Të enjten ka folur edhe presidenti ukrainas Volodymyr Zelensky, i cili ka thënë se 30% e termocentraleve janë shkatërruar nga sulmet ajrore ruse.
Ukrenergo ka shtuar se ka pasur më shumë sulme në objektet e energjisë në 10 ditët e fundit sesa në të gjithë periudhën e mëparshme që nga pushtimi i Rusisë më 24 shkurt.
Ukrenergo ka thënë se ndërprerjet e energjisë mund të ndodhin “në të gjithë Ukrainën nga ora 7 e mëngjesit deri në 22:00” dhe ka këshilluar qytetarët të kontrollojnë faqet e internetit të operatorëve të rrjetit rajonal për të parë se ku dhe kur saktësisht do të ketë ndërprerje.
Ndërprerjet tashmë kanë filluar në disa pjesë të Ukrainës, veçanërisht në Kiev.
Autoritetet kanë kërkuar nga ukrainasit që të reduktojnë përdorimin e energjisë në mbrëmje.