Pas zhvillimeve të fundit në RTK, ushtruesja e detyrës së drejtoreshës së përgjithshme të transmetuesit publik, Zana Spahiu, dha dorëheqje nga pozita e saj.
Por megjithatë, kërkesa për dhënie të përgjegjësisë po vazhdojnë të bëhen edhe ndaj bordit të RTK-së, pas publikimit të një artikulli të mediumit boshnjak “Slobodna Bosna”, ku pretendohej se dy mediume kosovare paguhen nga Serbia.
Dorëheqja e Spahiut nuk po vlerësohet si e mjaftueshme nga Instituti i Kosovës për Drejtësi.
“Duhet parë si një veprim të lartë të integritet të saj profesional e personal edhe përkundër se ka qenë personi ose pozita me më së paku faj për skandalin e fundit që ndodhi. Nëse u ka mbetur vetëm pak kredibilitet, nëse kanë interes për ta ruajtur RTK-në, atë se çka ka mbetur nga ky institucion publik, të njëjtit do duhej të ofronin dorëheqje të parevokueshme. Kanë dështuar që përmes një procesi të drejtë ta emërojnë një drejtor i cilit është militant i VV-së dhe kanë dështuar që ta ruajnë paanshmërinë e RTK-së”, ka thënë Ehat Miftaraj.
Pritje që RTK-ja të mbajë përgjegjës gjithë zinxhirin e individëve që kanë marrë vendimin për publikimin e raportit, ka edhe Asociacioni i Gazetarëve të Kosovës.
“Tashmë është e njohur publikisht që përgjegjësinë e ka marrë Drejtori i Televizionit RTK1, Rilind Gërvalla, dhe ai duhet të jetë njeriu që duhet të largohet nga drejtimi. Ai, në radhë të parë, duke qenë aktivist shumë vjeçar i Vetëvendosjes, asnjëherë nuk duhej të emërohej në atë pozitë, për shkak të ndikimit të dukshëm politik. Përgjegjësinë kryesore për të menaxhuar situatën e ka Bordi i RTK-së, dhe nëse nuk mund ta menaxhojë situatën duhet që edhe Bordi të japë dorëheqjen”, ka thënë Xhemaj Rexha.
Raportimin e RTK-së e kanë shfrytëzuar zyrtarë të lartë të partisë në pushtet, Lëvizjes Vetëvendosje, për të sulmuar dy mediumet e përmendura.
Megjithatë, bashkëpartiaku i tyre Glauk Konjufca, që është kryetar i Kuvendit të Kosovës, ka injoruar gjatë ditës pyetjen për këtë çështje.
“Këtë pyetje dërgoma me shkrim, ndoshta të përgjigjem, sepse sot po duam t’ia ruajmë 26 Korrikut dinjitetin e vet”, ka thënë Konjufca.
Për të trajtuar përgjegjësinë editoriale në këtë rast, bordi i RTK-së ka krijuar një komision ad hoc.
Megjithatë, nga i njëjti kanë refuzuar të japin përgjigje mbi punën e komisionit dhe kohën kur ai pritet të dalë me ndonjë përfundim, me arsyetimin se do të ndërhyhej në punën e tij.
Dorëheqja e Spahiut do të jetë efektive nga 30 korriku, e pak para saj lirimin nga detyra e ka kërkuar edhe redaktori i atij edicioni qëndror të lajmeve, Jeton Musliu.