Policia e Kosovës, të hënën e 12 qershorit, ka njoftuar se është arrestuar i dyshuari i dytë për rastin e dhunimit të ndodhur dy muaj më parë në komunën e Fushë-Kosovës.
Nëpërmjet raportit 24-orësh, Policia ka bërë të ditur se janë zhvilluar hetime të detajuara në lidhje me rastin e ndodhur në Fushë-Kosovë, më 2 prill 2023.
Sipas njoftimit, prokurori i rastit ka marrë vendimin për të dërguar të dyshuarin në mbajtje, duke i vënë ndalim të përkohshëm.
“Pas hetimeve të detajuara, me datë 11.06.2023, lidhur me rastin është arrestuar i dyshuari i dytë mashkull kosovar dhe me vendim të prokurorit është dërguar në mbajtje”, thuhet në njoftimin e policisë.